dimi3on (dimi3on) wrote in lingwadeplaneta,
dimi3on
dimi3on
lingwadeplaneta

О том, как человек и бобр вместе жили и дружили

Отрывок из книги Пришвина о Серой Сове
medium_Castor_fiber
10857949_401962896623383_428777154774918071_n
10849824_401962829956723_4123299944281027028_n
JEN E BOBRA FAI AMIGITAA

Seson de shikaring pasi. Shulin fa-vakue. Grey Ulu e Jelli, kada pa swa-ney modus, begin tayari fo hima. Huta loki bli lak; dar wo akwa ausflui fon lak ye torfa-ney sumpa kovren bay birka. Grey Ulu begin haki birka fo jal-ligna. Jelli selekti fo swa den loko do jamile paisaja: ela zwo habitilok bli ruchey kel flui fon monta along baum-bekresen yaruga. Ela konstrukti aus glina, stikes e moha den vere fortesa. Inen it ye magnifike klin kama aus lignaflok aus ti ela chori na planka. Yoshi inen ye syao depoo de chiwat. Yedoh, evidentem, hir pa sole ela bu sta muy hao: ela oftem desendi a kampa e pasi mucho ora dar. Wen snegi, ela fobi go. Dan Grey Ulu selfa visiti ela. Pinchanem ela audi luy stepas fon gran dalitaa e lopi fo miti lu, al krai e al serpi swa pa signa de saluta.

Tak, al visiti mutu, animal e jen en-fai gro-amigitaa. Koyves Grey Ulu sidi duran mucho ora al observi elay gunsa. Koyves lu iven begin helpi ela. Afte ke ais kovri akwa e Jelli bu visiti lu pyu, Grey Ulu oftem porti ela a she lu in boxa pa bey. Evidentem ela bu iri por tal safara. Al dao ela fai longe bashan e generalem trai komuniki. Ela returni a she swa via ti ela findi na sub-ais-ney dao. Ela sempre pai ateni dom salimem. Yedoh Grey Ulu sempre akompani ela along sahil, kun el-fanus. Lu go a huta sol afte mah swa serte ke ela es she swa. Distansia es es pyu kem haf-milya. Ela pai swimi sub ais tanto longem bikos ela sovi nos inu udra-dunes fo pren aira.


Unves pa nocha, afte ke ela go wek, Grey Ulu en-somni. Pa sabah lu vidi ke dwar es ofni-ney e ke ela zai somni on kushen bli lu. Depos dan ela bu go wek, evidentem ela desidi himavati she masta. Grey Ulu kupi un bugran zinken pen fo akwa e instali it inu yama kaven bli un mur. Ela examini pen longem e rekoni it kom godi-she. Yedoh ela bu es santush om huta selfa. Ela kavi, via mucho gunsa, un longe tunel sub huta-angula. Al zwo se, ela ausbringi montones de kicha e poy rassmiri it on poda, kom blines. Si Grey Ulu mah-wek kicha, ela snova en-gun gro-aktivem e snova sertene parta de poda fa-kovri bay kicha. Aus sey arda ela zwo fo swa den kamina a akwa-pen; yoshi ela zwo un hao-topten maidan-ki fo pleing. Wen ela fa-serte ke Grey Ulu bu mah-wek arda pyu, ela fa-kalme e bu kavi sub huta pyu (lo kel es hao, bikos huta wud mog lwo).

Afte fin de sey arda-gunsa, fa-reveli ke it bin sol beginsa. Ela yao shanji ol interne organisa de huta. Pa nochas ela gun om boxa kun jal-ligna. Elay gola es tu bildi aus ligna den klimbi-konstrukta, dabe ela mog ateni winda e tabla. Olo kel bu es aus fer o stal, it gei begun, e begunsa simili koy orgia do destrukting. Osobem ela atenti dwar-nicha, fon kel fengi idyen. Ela kalafati it bay eni material ke ela findi, oftem bay manta. Si Grey Ulu reproshi ela, elay destruktive aktivitaa stopi sol fo kelke taim. E si Grey Ulu slapi-bati ela, se kausi skwiling kun energike turning, kapa-swinging e otre truk-ney muving, dank a kel bobra sembli tanto drole duran un-ney yar de jiva.

Koyves eventi ke Grey Ulu lusi sabra e yao puni ela seriosem. Ela samaji se tuy: ela en-stan on bakpatas, kan rek an luy fas, disputi-grumbli pa gao vos; ela sta insulten e indigne e selfa slapi masta pa bey. Yedoh iven in kasu de extreme indigna ela neva yusi swa-ney dashat-ney denta. Pinchanem, wen Grey Ulu iri om ela, ela klimbi on boxa bli tabla, pon kapa on masta-ney tutas, kan luy fas e shwo-shwo koysa pa swa-ney lingwa, koysa kel simili "Wel, wen oni es amigas, kelke tabla-gamba o acha-graspika es ya do nul muhimtaa, bu ver?" E ela sempre gei pardoni. Ela es ya tanto hao, e oni bu mog iri om ela longem.

Oftem eventi ke Grey Ulu en-sidi on met aus hiran-derma bli forna, e Jelli apari, pon kapa on luy tutas e, al kan uupar, begin mah-chu seria de nostabile suones do farke ton. Se simili ganing. Duran sey sho ela kan lu fixem, also lu sempre slu ela kun fule gambirtaa. Sey taim-pasa sun bikam kada-dey-ney. Hao-audi-ke suones de ela, Grey Ulu opini li kom zuy ajibe ke lu gwo audi fon animales.

Pa tal dao jen e animal, la do jen-ney suluka e kinda-ney vos, malgree kelke nokonkorda, li fa oltaim pyu blise a mutu duran toy hima. Shayad es bikos ambi es ya sole-sta-she pa swa-ney modus. Shao-po-shao bobra begin konkordi kun jen iven den taim de jagifa, somnifa, chia. Kampa, olo inen it, kama, akwa-pen, elay syao habitilok, Grey Ulu selfa – se olo es nau elay prope munda. Ela kaulu jen kom bobra. Mogbi ela nadi ke koytaim ela ve bikam sam gran kom toy gran bobra e ve sidi kun lu pa tabla, oda kontrem, ke koytaim jen en-hev kauda e bikam yus tal kom ela.

Grey Ulu oftem go kupi fan, kwiti-yen kampa fo para dey. Wen lu returni, ela furia-nem darbi-darbi luy gambas, trai-yen renversi lu. Dan lu en-kokori e kwesti ela, komo ela sta-te duran sey taim. Ela en-sidi, sheiki kapa avan-bak, roli on bey, nokushalem salti sirkum lu. Afte ke lu delodi swa-ney tobogan, ela atentem examini kada kosa, kada paketa, til ke ela findi ti ela pri na yablas. Den paketa kun yablas, ela tori it tuy, pren bay handas e dentas tanto yablas kwanto mog e pa dwa pata go a akwa-pen. Dar ela chi un yabla e pon otres inu akwa.

Ela zin akwa bu oftem. Afte chu akwa-pen, ela pinchanem go a sertene plasa, en-sidi e auspresi akwa aus farwa. Ela akti bay avanpatas ga kom bay handas. Ela bu pri sidi in lokwa kel en-ye sub ela, also ela pren birkakuta e yusi it kom bani-met. Unves ela deskovri ke masta-ney kama godi muy hao fo se, bikos manta absorbi akwa. Afte masta-ney gro-eforta e bu sin elay indigna, ela begin zwo met aus birkakuta e moha pren-ney aus mur.

Fon taim a taim ela austiri fon swa-ney somnishamba den kama kel komponi aus magnifike longe lignaflok (strugi-ney fon poda) e trapas. Ela raspon se olo on poda fo airavating. Afte kelke taim ela opini airavating kom sufi-she e snova porti swa-ney kama inu somnishamba.

Wen ela fini chi, ela sempre porti pyata a angula e trai stavi it vertikalem on borda kontra mur. Ela gun om to til pai zwo to. Grey Ulu jan ke oli bobra trai stavi pyata on borda. Es bikos bobra yao manteni klintaa in swa-ney habitilok. Pa same dao bobra jami oli stik e oli pes e stavi li kontra mur.

Si Grey Ulu bringi branchas fo chia e pon li a koy nopinchan plasa, ela sempre porti li a plasa bli akwa e pon dar pa ordina. Ela bu toleri ke stikes o otre materiales sim lagi on poda. Ela pren se olo e porti a gran monton sub winda. Pa nofortuna, sey regula – tu pon olo butreba-ney a monton – gwansi yoshi sok, mokasin, woshi-planka, pruta-ney brum e tak for. Pruta-ney brum, fo ela it es kwasi simbol de mahta de klini-sha. Ela oftem porti it al examini ordina in huta. Koyves ela turan turni it nicha-uupar e begin chi it. Ela wekkusi po un pruta-ki e inutiri it a swa-ney muh, kati-yen it gro-kway bay denta. Al se ti ela chu na suon simili shum de buhao suti-mashina. Por brumes masta fai gro-kwerela kun ela, til ke lu samaji ke lo zuy simple es tu kupi nove-las.

Koyves ela bu yao chu swa-ney shamba. Dan ela, pa somnaful vos, begin sinfin-ney shwoing kun masta tra dun. Elay vos es nau pyu gao, nau pyu nise, e sembli ke ela verem shwo. Mogbi, ela realem probi shwo? Ela ya sempre trai jawabi a kada kwesta de jen. Bu sol pa dey, duran gunsa o chia, bat yoshi pa nocha, tra somna, bobra trai reakti a ti jen shwo na worda.

Dabe fulisi pen, treba go bringi akwa pet ves. Por to, dalwa-tintina bikam signal de akwa-shanja fo ela. Al he audi it, ela sempre chu swa-ney shamba, interfai inter gambas e kontroli, ob dwar es hao klosen afte ke masta chu, ob lenge aira bu fuki tra it. Tal ko-operata idyen mushkilisi gunsa fo Grey Ulu, yedoh ela jui se tanto gro ke lu sabrefai.

Yedoh zuy-ney juisa fo ela es tu zwo koysa prohibi-ney. Elay okos en-brili pa koy dusjoisa wen, afte zwo koysa bugai-ke, ela vidi ke Grey Ulu zai lai. Ela eskapi al skwili por fobi gei kapti e al sta pa extas.

Ela opini swa kom poseser de poda e de olo ke ela mog ateni, also de olo kel loki pa gaotaa do sirke dwa fut. Es maistitaa de kosas. Duran hima ela bu fai mucho destruktive aktivitaa. Ela es satisfakten bay porti kosas fon un plasa a otre. Yoshi ela examini e selekti kosas fo hunti li a sada ke ela he bildi fon habitilok til akwa-pen. Den sertene kosas – pa exampla, gual-muver, tin-ney ken, fer-ney kaptika – ela pon a sertene plasa; si oni reloki li, ela sempre reloki li bak a toy plasa, kwanto unkwe ves treba zwo to. Wen ela realisi swa-ney proyekta, ela gun tanto lagan-nem ke fogeti om olo otre. Ela fai pausa sol fo chi e fo kangi swa-ney farwa bay kushale patas.

Ela es shalishil kom maimun e kaprisishil kom kinda. Ela es gro-ney selfa-volnik e ela hev forte instinkta de posesa, lo kel es aika naturale fo jivika kel bildi dom fo swa e transformi milyoo. Den tote kampa, ela sin duba opini it kom swa-ney hevsa. Koyves jen lai fo kan ela, bat ela lasi bu kadawan zin kampa. Ela examini kada jen longem e atentem. Ela lasi koys zin, bat si ela bu pri koywan, ela en-stan on bakpatas e trai wekpushi ta aus kampa. Se fai sensasion miden gastas, e oni en-nami ela Masta de lak, o Regina de lak. Regale titla gradualem jiti. Treba shwo ke Regina guverni swa-ney stata-ki bay nomule handa.
Subscribe

  • Post a new comment

    Error

    default userpic

    Your reply will be screened

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 2 comments